Пишува: Никола Тасев
Тешки, кризни времиња веќе подолг период го притиснаа светот. Пожари има насекаде. И кај нас е така. Но тука, одамна веќе не гори само во шумата. Гори на сите страни: во правдата, во економијата, во администрацијата, во безбедноста, во евроинтеграциите….
Во Македонија секој проблем си има свој огин. Некои пламени вивнуваат поради неработење, некои поради корупција, некои оти имаме пиромани кои не му ја мислат на последиците.
Да, да за жал пожарите во нашата држава се многу чести! Најголемиот дел се наследени од претходните седум години, кога имавме власт, која наместо да ја чува држава, секојдневно потпалуваше нови, а старите огнови ги оставаше недоизгаснати. Ја пеплосаа Македонија на сите полиња.
Граѓаните пекаа по добар пожарникар и на изборите таа улога му ја дадоа на Христијан Мицкоски. Тој се нафати на тешката и ризична работа. Дали добро си ја врши задачата?
Го гледавме како летово гасеше вистински пожари во шумите. Му подметнуваа и пожари околу Скопје – и нив ги локализира, а потоа ги изгасна. Но изгледа дека тоа му беше само тренинг за овие поголемите: државните, економските, политичките, бриселските…
Пожарот со нискиот стандард на пензионерите го гасне континуирано. Пламените јазици кои одамна ги зафатија здравството и образованието ги намалува. Ги мафна и чудните пожари кои со години ги кочеа градењата на инфраструктурата низ Македонија. Едноставно, пожарникарот е цело време растрчан на терен и гаси секаде каде треба.
Ама пироманите не мируваат. Некои упорно сакаа да запалат меѓуетнички пожар, но Мицкоски и го гаснеше и делуваше превентивно, одмерено, а во Кичево на изборите дури и посериозно ги ослабна пироманите.
Ама другите пожари не се шегуваат – си тлеат и во даден момент пламнуваат.
Уште многу акции на пожарникарот може да се набројат. Некаде резултатите се одлични, некаде треба да се запне, некои уште не се лоцирани, но видливо е дека пожарникарот има добар нос да го насети чадот и не се мисли – тргнува да гаси.
Ќе успее ли? Може ли да го издржи темпото?
„Дури и премногу самиот, со уште два-тројца посериозни пожарникари, гаси. Мора да ги подтурне „во оган” и многуте други пожарникари во неговата бригада и тие да сработат, да си ја заслужат платата, да помогнат во совладувањето на пламенот”, коментираат многумина.
И во право се! Оти многу пожари има за гасење во Македонија, за еден човек да може стигне на сите места, затоа му треба реорганизација во противпожарната единица со дополнителни луѓе, со квалитетна опрема. А, и да се заменат пожарникарите кои не се покажаа успешни во изминатава година. На оние, кои наместо со вода гасеа со бензин или пак чекаат да дојде главниот пожарникар за да почнат да гасат, не им е веќе местото во главната македонска противпожарна бригада.
Оти допрва следуваат и нови пожари, а некои од старите се распламтуваат. Од Брисел вчера, на пожарот што го разгори претходната власт околу евроинтеграциите и во кој потпишаа да изгори македонскиот идентитет, фрлија нови суви гранки. Добро е што Мицкоски таму отиде со огноотпорниот пожарникарски скафандер, па се обидува да го стиша и тој пожар. Овие пламени јазици се едни од главните тестови кои ќе покажат колку пожарникарот е успешен, затоа и му треба поддршка.
А за жал, многумина и во Македонија одмагаат. Не само што му пречат во гаснењето, туку напротив и самите потпалуваат. Бивши функционери, извикани политичари, потплатени медиуми и самонаречени аналитичари, наместо да дојдат на припомош на пожарникарот, тие или дуваат во огнот за посилно да гори или сеират и чекаат пожарникарот да колабира од високата температура на пламенот.
Мицкоски е на потег. Видливо е дека не е излиен од восок, но колку е отпорен неговиот челик треба да покажува секој ден.
Треба секој ден да внимава да ги превенира и потенцијалните пожари во главите на новоизбраните градоначалници. Тие треба да сфатат дека пожарите лесно се палат од лошо работење, а и треба да разберат оти градоначалничката функцијата не е логорски оган околу кој се пее, се пие, се раскажуваат вицови и се делат тендери. Треба сериозна работа, инаку пожар ќе има и во општините. И тука ќе треба да гаси главниот пожарникар.
На крај мора да бидеме искрени и да го обвиниме главниот бригадир дека е лично одговорен за еден пожар. И тоа не мал! На локалните избори, така силно ги запали штабовите на СДСМ и ДУИ, што од таму се уште и неколку дена по гласањето се шири густ чад. Тие пожари партиите сами ќе ги гаснат, а потоа прочистени треба и тие да помогнат на пожарникарот, оти „Македонија без пожари“ е приоритет.
