Претседателот Доналд Трамп синоќа му даде нов рок на Техеран од 48 часа да склучи договор или да се соочи со „цел пекол“. Дополнително, во неодамнешно обраќање изјави дека САД „во следните два до три недели ќе го вратат Иран во камено доба“, заканувајќи се со удари врз енергетската инфраструктура.
Републиканскиот сенатор Линдзи Греам, по разговор со Трамп, изјави дека е уверен оти претседателот ќе ги реализира своите закани.
„Целосно сум убеден дека ќе употреби огромна воена сила против режимот ако продолжат да го блокираат Ормускиот теснец и да одбиваат дипломатско решение“, напиша Греам.
На најновиот ултиматум од Трам, Иран одговори преку Али Абдолахи, командант на противвоздушната одбрана, кој предупреди дека за САД и Израел „ќе се отворат вратите на пеколот“ доколку конфликтот дополнително ескалира.
Абдолахи го нарече Трамп „агресивен и воинствен претседател“, оценувајќи дека неговите закани за напади врз инфраструктурата се „очајни и непромислени“. Тој порача дека во случај на американски напад, Техеран ќе возврати со удари врз инфраструктурата што ја користат американската војска и Израел.
Според него, таквите напади ќе се спроведуваат „без никакви ограничувања“, што дополнително ја зголемува опасноста од широка регионална ескалација.
