Во сила стапи локално примирје меѓу Русија и Украина со цел да се овозможи спроведување хуманитарна операција во окупираниот град Олешки, соопштија двете страни во одделни изјави.
Руското Министерство за одбрана соопшти дека од 4 часот по московско време е прекинато гранатирањето во правец на украинскиот град Херсон, со цел да се создадат услови за реализација на хуманитарната мисија во Олешки.
Истовремено, украинскиот омбудсман Дмитро Лубинец потврди дека и украинската страна го почитува договореното примирје, наведувајќи дека прекинот на огнот започнал во истиот термин.
Олешки се наоѓа на левиот брег на реката Дњепар, непосредно спроти Херсон, кој е под контрола на украинските сили. Според информациите, во градот се наоѓаат околу 2.000 цивили кои немаат пристап до храна, лекови и други основни потреби.
Поради присуството на мини и интензивната употреба на беспилотни летала во околината, жителите не можат безбедно да го напуштат градот, пренесува Асошиејтед прес.
Минатата недела Белата куќа соопшти дека првата дама на САД, Меланија Трамп, помогнала во обезбедувањето на договорот за локалното примирје, кое треба да овозможи безбедна испорака на хуманитарна помош и евакуација на цивилите.
