Телевизискиот новинар и принц Едвард Рукиди Њабонго е избран за нов крал на традиционалното кралство Торо во Уганда, по смртта на досегашниот монарх Ојо Њимба, кој почина минатиот месец на 34-годишна возраст.
Њабонго, кој со години работел како водител и уредник во државната „Уганда Бродкастинг Корпорејшн“, не важел за главен фаворит за престолот. Сепак, старешините од кралскиот клан Бабиито го избрале меѓу принцовите кои ги исполнувале условите за наследување.
По изборот, новиот монарх поминал низ традиционални ритуали и во текот на ноќта влегол во кралската палата, пред официјалното претставување пред народот во Форт Портал.
Неговото поставување на престолот, сепак, предизвика несогласувања. Кралицата-мајка Бест Кемигиса го оспорила изборот, тврдејќи дека не бил земен предвид тестаментот на покојниот крал Ојо, кој, според неа, оставил малолетен син. Таа наведе дека идентитетот на детето ќе биде откриен во соодветен момент, што дополнително ги отвори прашањата околу наследувањето.
Покојниот крал Ојо Њимба седнал на престолот во 1995 година, кога имал само три години, а во јавноста беше познат како еден од најмладите монарси во светот. За време на неговото владеење имал средби и со повеќе светски лидери, меѓу кои Нелсон Мандела и поранешниот либиски лидер Моамер Гадафи.
Традиционалните кралства во Уганда биле укинати во 1960-тите години, а повторно биле обновени во 1993 година. Иако денешните монарси немаат официјална политичка моќ и не смеат да учествуваат во партиска политика, тие и понатаму имаат значајна културна и општествена улога.
