Приватна клиника во Солун се соочува со трајно затворање и одземање на дозволата за работа, откако Националната управа за транспарентност на Грција (ЕАД) утврдила низа сериозни неправилности во нејзиното функционирање.
По спроведената контрола, инспекторите утврдиле дека во клиниката работело онколошко одделение без соодветна законска дозвола, а во него се вршеле хемотерапии иако таква дејност не била наведена во официјалната дозвола за работа.
Според извештајот на ЕАД, одделението било опремено со потребната медицинска опрема, а неговото постоење било промовирано и преку официјалната веб-страница на клиниката. Во него работел само еден лекар – пулмолог со специјализација во пулмонална онкологија, кој немал договор за работа со установата.
Утврдено било и дека клиниката немала доволен број медицински сестри и стручен персонал, немала функционална единица за интензивна нега, иако таа била задолжителна според прописите, како и дека со дел од лекарите немало регулирани работни односи.
Од ЕАД посочиле дека лекарот од 2022 година препишувал терапии за хемотерапија на пациенти, а потоа лекувањето се спроведувало во нерегистрираното онколошко одделение на клиниката. Подготовката на терапијата ја вршел персоналот на установата.
Инспекциските органи наведуваат дека и лекарот сноси одговорност за функционирањето на одделението без дозвола, бидејќи пружањето здравствени услуги во простор кој нема соодветно одобрение е спротивно на професионалните и етичките обврски.
Претходни контроли во 2025 година веќе укажале на недостиг на медицински кадар и биле дадени препораки за одземање на дозволата за работа. Сепак, надлежните институции не постапиле по препораките за целосно затворање на клиниката.
По последниот извештај, ЕАД предложила трајно прекинување на работата на установата, одземање на дозволата и изрекување административни санкции.
Извештајот е доставен и до обвинителството за проверка на евентуална кривична одговорност, до Националната организација за обезбедување здравствени услуги и до лекарската комора за евентуална дисциплинска постапка.
Според грчките медиуми, се очекува клиниката да биде затворена во текот на денот.
