Шест американски авиони од типот KC-135R Stratotanker полетаа кон Блискиот Исток, што аналитичарите го толкуваат како јасен сигнал дека САД се подготвуваат за продолжување или проширување на воздушните операции против Иран. Иако овие летала не носат бомби, нивната улога е клучна во секоја поголема воздушна кампања.
KC-135 Stratotanker е американски воен авион за дополнување гориво во воздух. Тој не е наменет за директни напади, туку им овозможува на борбените авиони – ловци, бомбардери и извидувачки летала – да се наполнат со гориво додека се во лет, без слетување. Со тоа значително се продолжува времето на престој во воздух и радиусот на дејствување на ударните формации.
Авионот има капацитет од околу 90 тони гориво и е во употреба уште од 1950-тите години, со повеќе модернизации низ децениите. Во услови на ескалација, ваквите летала се клучен дел од логистичката поддршка што овозможува континуирани воздушни операции на големи растојанија.
