Во пресрет на првата годишнина од трагичниот пожар во дискотеката во Кочани, Мето Ди Флеш и Ана Петановска ја објавија песната и видеоспотот „Ангелски здив“, посветени на прерано згаснатите животи во несреќата што ја потресе целата држава.
Музиката, текстот и аранжманот ги потпишува Методи Поповски, кој вели дека песната ја создал „во еден здив“, воден од искрени чувства и длабока почит кон младите луѓе кои трагично го загубија животот.
„Ангелски здив“ е снимена во „Студио Флеш“, а во реализацијата учествувал и Стефан Петановски, во чие студио Ана Петановска ги снимила вокалите. Видеоспотот е во режија на Раде Гогоски, кој стои зад целокупната визуелна концепција – од идеја до финална реализација. Сцените се снимени во Струга и Скопје.
Во спотот се појавува и Анастасија Поповска, чија симболична улога ја претставува невината младост и сеќавањето на изгубените животи.
Иницијативата за проектот потекнува од сопственикот на локалот „Angels Cafe“ од Штип, кој ги обединил уметниците во заедничка мисија – преку музика да се испрати порака на љубов, сочувство и вечен спомен.
Пејачката Ана Петановска истакнува дека ова е една од најтешките, но и најискрените песни што ги испеала.
„Се надевам дека барем малку ќе им донесе утеха на семејствата на загинатите“, вели таа.
Според Мето Ди Флеш, „Ангелски здив“ не е само песна, туку порака и почит.
„Секој од нас вложи дел од своето срце во ова дело. Нека оваа песна биде потсетник дека тие млади животи никогаш нема да бидат заборавени“, додава тој.
