Една наставничка го загуби животот, а уште две лица се повредени во напад со нож што се случи во основно училиште во словачкото место Сташков. Според првичните информации, за нападот е осомничен ученик од осмо одделение.
Жртва е 61-годишна наставничка, додека меѓу повредените е ученичка која се наоѓа во критична состојба. Повредена е и 44-годишна наставничка, која се здобила со убодна рана во пределот на градниот кош.
По пријавата за нападот, на местото веднаш интервенирале полициски и медицински екипи. Во спасувачката акција биле вклучени две возила на итната медицинска помош и два хеликоптери.
Тешко повредената ученичка со хеликоптер била пренесена во болница во Мартин, додека повредената наставничка е хоспитализирана во болницата во Жилина.
Полицијата соопшти дека ситуацијата е целосно ставена под контрола и апелираше до јавноста да не шири непроверени информации додека трае истрагата. Засега не се соопштуваат детали за мотивот на нападот.
На местото на трагедијата пристигнале министерот за внатрешни работи Матуш Шутај Ешток, министерот за образование Томаш Дракер и министерот за здравство Камил Шашко.
Овој трагичен случај повторно ја отвори дебатата за безбедноста во словачките училишта. Во јануари 2025 година, во напад во образовна установа во Спишка Стара Вес беа убиени две лица, а едно беше повредено.
Надлежните институции продолжуваат со истрагата, а повеќе информации за околностите и мотивот за нападот се очекуваат во текот на денот.
