Моџтаба Хамнеи, верски службеник кој долго време се сметаше за една од највлијателните, но и најмалку видливи личности во иранскиот политички естаблишмент, е именуван за нов врховен лидер на Иран по смртта на досегашнот Ајатолах во американско-израелски воздушен напад.
Тој е син на убиениот ајатолах Али Хамнеи, кој беше врховен лидер на земјата од 1989 година.
Иранските државни медиуми, касно синоќа, објавија дека Моџтаба Хамнеи официјално со одлука на Собранието на експерти, тело од 88 членови кое според Уставот го избира највисокиот политички и верски авторитет во државата. Неговото именување, според иранските власти, е спроведено според уставната процедура, а не како наследно пренесување на власта.
Неговото име со години се споменуваше како можен наследник поради блискоста со татко му. Со оваа одлука Моџтаба Хамнеи станува трет врховен лидер на Исламската Република од револуцијата во 1979 година.
Врховниот лидер има последен збор за клучните државни прашања, меѓу кои надворешната политика и нуклеарната програма. Западните сили настојуваат да го спречат Иран да развие нуклеарно оружје, додека Техеран тврди дека програмата има исклучиво цивилна намена.
Тој е роден на 8 септември 1969 година во Машхад, еден од најважните верски центри во земјата. Тој е втор син на Али Хамнеи и едно од шесте деца во семејството. Растел во период на силни политички превирања и бил сведок на подемот на својот татко во Исламската револуција. Се оженил со Захра Хадад-Адел, ќерка на конзервативниот политичар Голам-Али Хадад-Адел, поранешен претседател на парламентот. Неговата сопруга била меѓу загинатите во американско-израелскиот напад врз семејниот комплекс во Техеран. Моџтаба го преживеал нападот, но изгубил повеќе членови од своето семејство. Верското образование го стекнал во градот Ком, центар на шиитската теологија во Иран. Таму студирал исламско право и теологија кај неколку истакнати конзервативни верски учители. Поголем дел од својата кариера го поминал предавајќи на верски семинари во Ком.
И покрај долгото присуство во клерикалниот естаблишмент, никогаш не извршувал формална државна функција. Во 2019 година Соединетите Американски Држави му воведоа санкции, тврдејќи дека има значително политичко влијание во рамките на иранскиот режим.
