Македонските патници повторно ќе имаат директна авионска врска меѓу Скопје и Дубаи, откако авиокомпанијата „Флајдубаи“ најави дека од 1 април 2027 година повторно ќе ја воспостави оваа линија.
Според најавениот распоред, летовите ќе се реализираат трипати неделно – секој понеделник, четврток и сабота. Авионот од Скопје ќе полетува во 14:30 часот и ќе пристигнува во Дубаи во 21:45 часот по локално време. Повратните летови од Дубаи ќе бидат во 9:55 часот, со пристигнување во Скопје во 13:30 часот.
Најниската цена за повратен билет во економска класа, според објавените информации, започнува од 580 евра, додека билетите во бизнис-класа се нудат од околу 3.000 евра. Конечната цена ќе зависи од периодот на патување, достапноста и условите за резервација.
Враќањето на директната авиолинија ќе овозможи и полесни поврзувања со повеќе далечни дестинации преку Дубаи. Благодарение на соработката со „Емирати“, патниците од Скопје ќе можат да продолжат кон Австралија, Шангај, Сингапур, Бангкок, Коломбо и Занзибар.
Од авиокомпанијата посочуваат дека линијата е особено значајна за македонската дијаспора во Азија и Австралија, но и за деловните патници и туристите. Истовремено, директната врска се очекува да придонесе и за поголем број туристи од Обединетите Арапски Емирати во Македонија.
„Флајдубаи“ првпат започна да лета на релација Скопје – Дубаи во октомври 2012 година, а со повторното воведување на линијата повторно ќе биде присутна на македонскиот авиосообраќаен пазар.
