Одземањето на дозволата за работа на „Алта банка“ во Србија не значи автоматско одземање на дозволата за работа на „Алта банка“ АД Битола, соопшти Народната банка на Македонија.
Оттаму појаснуваат дека одлуката на Народната банка на Србија се однесува исклучиво на работењето на банката во Србија и нема автоматско правно дејство врз македонската банка.
„Во врска со одлуката на Народната банка на Србија за одземање на дозволата за работа на ‘Алта банка’ а.д. Белград, Народната банка посочува дека оваа одлука се однесува на работењето на банката во Република Србија и сама по себе не значи автоматско одземање на дозволата за работа на ‘Алта банка’ АД Битола“, наведуваат од централната банка.
Од Народната банка истакнуваат дека „Алта банка“ АД Битола е самостојно правно лице, основано и регистрирано во Република Северна Македонија, чие работење се оценува согласно домашната законска и регулаторна рамка.
Во соопштението се додава дека Народната банка, како надлежен супервизор, континуирано ја следи состојбата и постапува во согласност со законските одредби.
