Русија воведе привремени ограничувања на воздушниот простор над воениот полигон Капустин Јар во Астраханската област, што, според украинското специјализирано издание „Дифенс експрес“, може да укажува на подготовка за нови ракетни тестирања.
Ограничувањата ќе важат од 28 септември до 3 октомври, секој ден во периодот од 9 до 19 часот. Вакви мерки вообичаено се воведуваат поради безбедносни причини за време на лансирања или други активности поврзани со ракетни системи.
Украинскиот медиум наведува дека, поради локацијата на ограничувањата, постојат шпекулации оти Русија би можела да тестира балистички ракети или ракетниот систем со среден дострел „Орешник“, кој може да носи и нуклеарна боева глава. Засега, сепак, нема официјална потврда каков тип ракета евентуално би бил тестиран.
Полигонoт Капустин Јар и претходно беше поврзуван со лансирања на ракети „Орешник“ кон Украина, но актуелните ограничувања сами по себе не потврдуваат дека ќе има ново лансирање.
Во меѓувреме, украинските власти соопштија дека Киев повторно бил цел на руски балистички ракети и беспилотни летала. Според објавените информации, нападите предизвикале штети на повеќе објекти, меѓу кои магацини, станбени згради, деловни објекти, бензински пумпи, центри за податоци и зградата на Националната академија на науките на Украина.
Според достапните информации, во нападите загинале најмалку седум лица, а повеќе од 80 биле повредени.
Во Москва, портпаролот на Кремљ, Дмитриј Песков, изјави дека шансите за брз мировен договор во моментов се мали. Тој оцени дека неодамнешните украински напади дополнително ги намалиле изгледите за напредок во преговорите и порача дека Украина „ќе мора да плати цена“ за своите активности.
