Основниот суд во Струга му изрече парична казна од 5.000 евра на поранешниот градоначалник на Општина Струга, Рамиз Мерко, поради незаконско поставување спомен-плоча на влезот од општинската зграда.
Според пресудата, со поставувањето на спомен-обележјето биле исполнети елементите на кривичното дело предвидено во член 27 од Законот за меморијални споменици и спомен-обележја, бидејќи, според обвинението, било поттикнато чувство на етничка омраза и раздор меѓу жителите на Струга.
Судијата Јордан Јованов во образложението истакна дека од доказите произлегува оти одговорноста е кај тогашниот градоначалник, нагласувајќи дека плочата била поставена на зградата на Општината, а Мерко како прв човек на локалната самоуправа дал налог за плаќање, со што, според Судот, признал дека не била испочитувана законската процедура.
При донесувањето на одлуката, Судот се повикал и на мислењето на Комисијата за спречување и заштита од дискриминација, кое останало во сила откако биле отфрлени тужбите пред Управниот и Вишиот управен суд. Во мислењето, изработено со стручна помош од Институтот за национална историја, било оценето дека спомен-плочата може да предизвика етничка и верска нетрпеливост.
Одбраната тврдеше дека Мерко нема никаква поврзаност со поставувањето на плочата и дека тоа го сторило Здружението на пензионери Албанци, кое традиционално организира одбележување на Денот на албанската азбука. Мерко изјави дека за плочата дознал дури по интервенцијата на државните инспектори за култура.
Ова е уште една судска одлука против поранешниот струшки градоначалник. Претходно тој беше осуден и за незаконско именување директори во шест училишта, при што пет пресуди веќе се правосилни, додека во предметот за набавката на службеното „Ауди А6“ беше ослободен од обвинението.
