Доаѓа пролетта, би требало сивилото на Скопје да се припокрие со раззелнети дрвја. Ама ќе биде ли така? Многу сиви згради се насадија, а малку млади дрвца.
Градот со години се соочува со недостиг од дрвја, со запуштени тревници и исушени садници што никој не ги обновува. Е, сега е периодот кога сите градски и општински служби треба да се мобилизираат и масовно да се засадуваат нови дрвја на секое слободно парче земја.
Речиси сите кандидати за градоначалници во изминатите изборни циклуси ветуваа „зелени општини” и „зелено Скопје”, но скопјани сè уште чекаат тоа и да се направи посеопфатно.
Засадувањето дрвја не е само естетика, туку прашање на јавно здравје, квалитет на воздух и квалитет на живот. Скопје е меѓу градовите што редовно се соочуваат со загадување, а секое ново дрво значи и повеќе сенка, помалку прашина и подобра микроклима.
Ајде, време е за садење. Но, не само во ад-хок акции колку да има фотографирање, потребна е системска и континуирана стратегија за пошумување.
И не само институциите, туку и самите скопјани треба да се активираат преку здруженијата, па дури и куќните совети.
Пролетта е вистинскиот момент зборовите да се претворат во лопати, а ветувањата во садници. Ако не сега – кога?
