Амбасадорот на Европската Унија во Северна Македонија, Михалис Рокас, денеска ќе му го врачи на премиерот Христијан Мицкоски Извештајот на Европската комисија за напредокот на земјава.
По средбата во Владата, Мицкоски и Рокас ќе одржат заедничка прес-конференција, на која се очекува да ги претстават клучните оценки од документот.
Во извештајот, кој вчера беше презентиран во Брисел, Европската комисија оценува дека Северна Македонија активно се вклучила во новиот План за раст за Западен Балкан и ги интензивирала активностите за исполнување на четирите столба – интеграција во единствениот пазар на ЕУ, регионална економска интеграција, спроведување суштински реформи и поголема финансиска поддршка.
Сепак, Брисел посочува дека и понатаму останува потребата од реализација на клучните реформи поврзани со европската агенда на земјава.
Во делот на надворешната политика, Европската комисија констатира дека Македонија ја задржала целосната усогласеност со заедничката надворешна и безбедносна политика на Унијата, вклучително и во однос на руската агресија врз Украина. Ова, според оценката во извештајот, ја потврдува стратешката определба на државата за членство во ЕУ и нејзината позиција како сигурен партнер.
Во документот се наведува и дека земјава продолжила со подготовките на потребната документација за исполнување на условите за отворање на првиот кластер „Основи на процесот на пристапување“.
Сепак, Европската комисија забележува дека нема напредок во усвојувањето на уставните измени, кои се дел од заклучоците на Советот на ЕУ од 2022 година.
Во извештајниот период продолжило и спроведувањето на Спогодбата за стабилизација и асоцијација, а Комитетот за стабилизација и асоцијација одржал состанок во април 2026 година, прв по 2021 година.
Европската комисија оценува дека Северна Македонија одржувала добри односи со останатите земји од процесот на проширување и продолжила да учествува во регионалните иницијативи.
