Македонија останува цврсто определена за членство во Европската Унија, но очекува евроинтегративниот процес да се темели на јасни правила, заслуги и мерливи критериуми, порача премиерот во обраќањето пред Генералното собрание на Обединетите нации.
Тој истакна дека европската интеграција и натаму претставува стратешка цел на државата, нагласувајќи дека земјата нема да се откаже од европската идеја, и покрај предизвиците со кои се соочува на тој пат.
„Нема да се откажеме од европската идеја затоа што европскиот пат беше тежок. Европската Унија за нас останува нашиот природен политички, економски и институционален дом“, порача премиерот.
Во говорот нагласи дека реформите во државата не смеат да зависат од текот на преговорите со Брисел, туку се обврска што Македонија ја има кон сопствените граѓани.
Според него, неопходно е да се зајакне владеењето на правото, да се изградат поефикасни институции, поконкурентна економија и да се врати довербата на граѓаните во државата.
„Тоа е наша одговорност и нема да ја префрлиме на Брисел“, истакна премиерот.
Тој испрати и порака до Европската Унија, нагласувајќи дека очекува пристапниот процес да остане заснован на однапред утврдени критериуми, без дополнителни билатерални условувања.
„Не бараме полесен пат. Бараме пат уреден со правила. Не бараме пониски стандарди. Бараме стандардите да останат стандарди“, рече премиерот.
Во завршницата оцени дека кредибилитетот на Европската Унија ќе зависи од нејзината способност дадените ветувања да ги претвори во конкретни политички резултати, истовремено останувајќи доследна на вредностите што ги застапува.
