Повеќе од 50.000 жени и девојчиња секоја година го губат животот како последица на насилство извршено од интимен партнер или друг член на семејството, беше истакнато на регионалната конференција за фемицид во Југоисточна Европа, која денеска започна во Собранието.
Учесниците на конференцијата порачаа дека фемицидот не смее да се смета за изолиран или приватен семеен проблем, туку за најтешка последица на долгогодишно родово базирано насилство кое честопати останува незабележано или без навремена институционална реакција.
Според презентираните податоци, во текот на 2024 година во светот биле убиени околу 83.000 жени и девојчиња, а речиси 50.000 од нив биле жртви на интимен партнер или член на семејството. Тоа значи дека во просек секој ден животот го губат 137 жени и девојчиња во вакви околности.
Потпретседателката на Собранието, Весна Бендевска, оцени дека земјите од регионот бележат напредок во унапредувањето на законската рамка, но предупреди дека и натаму постојат предизвици поврзани со различните дефиниции на фемицидот, недоволно усогласените податоци и нееднаквата примена на законите.
Таа нагласи дека ефикасната превенција зависи од навременото препознавање на ризиците и координираната реакција на сите надлежни институции.
На конференцијата беше истакнато и дека Македонија во последните години направила чекори кон зајакнување на системот за заштита од родово базирано насилство, меѓу кои и измените на Кривичниот законик донесени во 2023 година.
