Од денеска до 26 септември Скопје ќе биде домаќин на седмото издание на Скопскиот градски фестивал, кој годинава ќе биде во знакот на музичката и културната соработка меѓу Македонија и земјите од регионот.
Фестивалската програма обединува уметници од Македонија, Словенија, Албанија, Грција, Црна Гора и Бугарија, кои преку концерти ќе ги поврзат џезот, класичната музика, современото авторско творештво и богатото балканско музичко наследство. Дел од проектите се создадени специјално за ова издание и ќе бидат изведени премиерно пред фестивалската публика.
Организаторите од „Баги Комуникации“ велат дека целта е фестивалот да биде место каде што музичарите не само што настапуваат, туку и создаваат заеднички дела, поврзувајќи различни генерации, традиции и музички правци.
Меѓу најавените настапи е концертот на словенечкиот саксофонист и композитор Васко Атанасовски, кој ќе настапи заедно со ансамблот Profundus. Публиката ќе има можност да слушне авторски композиции, како и дела инспирирани од балканската музичка традиција.
Посебно место во програмата има проектот што ги обединува македонскиот контрабасист Мартин Ѓаконовски, албанскиот пијанист и композитор Gent Rushi и грчкиот хармоникаш Thanos Stavridis. Тројцата музичари специјално подготвија заедничко музичко дело, кое премиерно ќе биде изведено токму на фестивалот.
Љубителите на класичната музика ќе можат да го проследат и проектот „Балкански композитори“ на пијанистката Милјана Николиќ, посветен на современото творештво од регионот. Во истата фестивалска вечер ќе настапи и македонскиот гитарист и мултиинструменталист Мухамед Ибрахими, познат по спојувањето на ориенталните влијанија со современиот акустичен звук.
Концертна промоција на албумот „Beyond The Silence“ ќе одржат македонскиот виолончелист Антонио Илиоски и бугарската пијанистка Јана Василева Лолова, кои преку својата соработка градат мост меѓу двете музички сцени.
На 20 септември, на летната сцена „Лепеза“ во Градскиот парк, ќе настапи и младата скопска група „Фрекфенција“, составена од ученици од основно училиште, со што фестивалот испраќа порака за поддршка на младите музички таленти.
Концертите ќе се одржуваат во камерната сала на Македонската филхармонија.
Основан во 2021 година, Скопскиот градски фестивал досега прерасна во препознатлива културна манифестација, која низ изминатите шест изданија обедини повеќе од 100 уметници од Македонија и регионот и иницираше бројни нови музички проекти и соработки.
