Утрово непрописно одбележаното градилиште во Општина Центар каде викендов свлечиште предизвика сериозно оштетување на коловозот, тротоарската површина, канализационата мрежа и уличното осветлување на булеварот „Теодосиј Гологанов” во близина на Католичка црква се оградува со ленти за да се овозможи движење во непосредна близина на оштетениот простор.
При копањето на дупка за нова зграда, беше предизвикано свлечиште на земјата при што беше затрупан багер, оштетени делови од тротоарот и улицата, а врз паркирано возило падна бандера.
Општина Центар за случајот до Основното јавно обвинителство достави официјално известување со цел понатамошно постапување во рамки на нивните надлежности.
Дополнително, од страна на градежниот инспектор на Општина Центар ќе биде побарано одземање на лиценците на одговорните лица вклучени во изградбата, а Општината ќе побара и утврдување одговорност од надзорот и изведувачот на објектот поради несоодветно и несовесно постапување, согласно законските прописи по што ќе следуваат и соодветни пријави и постапки пред сите надлежни институции.
