Израелскиот премиер Бенјамин Нетанјаху тајно отпатувал во Абу Даби, каде што се сретнал со претседателот на Обединетите Арапски Емирати, шеикот Мухамед бин Зајед Ал Нахјан, објавија израелските медиуми.
Посетата не била претходно најавена од кабинетот на Нетанјаху, а тој до ОАЕ патувал со приватен авион во сопственост на израелски бизнисмен.
Според израелскиот јавен сервис Кан, авионот полетал од аеродромот „Бен Гурион“, а Нетанјаху поминал околу четири часа во Абу Даби пред да се врати во Израел. Истиот авион, според медиумот, премиерот го користел и при претходно патување во Обединетите Арапски Емирати.
Посетата доаѓа во момент кога во Израел се води полемика околу информациите дека Нетанјаху бил предупреден пред нападот на Хамас на 7 октомври 2023 година. „Њујорк тајмс“ објави дека доверливото предупредување наводно дошло токму од претседателот на ОАЕ, но дека Нетанјаху не им го пренел на раководителите на израелските безбедносни служби.
Од ОАЕ, пак, за весникот „Нешнал“ посочиле дека безбедносните прашања со други држави се решаваат преку надлежните институции, а не директно меѓу државните лидери. Засега нема официјални детали за темите за кои разговарале Нетанјаху и шеикот Мухамед бин Зајед.
