НАТО нема да го одржи планираниот самит во Албанија во 2027 година, соопшти албанскиот премиер Еди Рама, додавајќи дека Алијансата сè уште нема донесено конечна одлука за терминот на следниот самит.
Рама веста ја објави во Даблин, каде што учествува на Самитот на Европската политичка заедница.
„Проблемот е што сè уште нема заеднички став за тоа кога ќе се одржи самитот, но сигурно нема да биде во 2027 година“, изјави Рама.
Тој додаде дека доколку НАТО одлучи да организира самит во 2028 година, Тирана останува подготвена да биде домаќин.
Плановите за одржување на самитот во Албанија беа доведени во прашање уште во текот на годинава. Според претходни информации, противење имало од администрацијата на американскиот претседател Доналд Трамп, а дел од земјите-членки изразиле незадоволство и поради ниските издвојувања на Албанија за одбраната.
Во меѓувреме, НАТО разгледува и можност да ја промени досегашната практика на организирање годишни самити. Таквата промена би значела поретко одржување на средбите на лидерите на Алијансата.
На самитот во Хаг во 2025 година беше најавено дека по Турција, која е домаќин во 2026 година, следниот самит ќе се одржи во Албанија. Сепак, во декларацијата усвоена по самитот во Анкара оваа година не беше наведено ниту местото, ниту датумот на следниот состанок, што дополнително ги поттикна шпекулациите за промена на плановите.
