Во Македонија досега се регистрирани 43 случаи на западнонилска треска, од кои 40 се лабораториски потврдени, а според досегашните информации има и 4 починати лица како последица на инфекцијата. Здравствените власти веќе мапирале 34 ризични области, од кои 13 се оценети како високо ризични, а за првпат случаи се регистрирани и во скопските општини Центар и Чаир.
Дополнителен сигнал за присуството на вирусот е и првиот потврден случај кај мртов гавран во Скопје, додека како критични точки се посочуваат застоените води, каналите за наводнување, септичките јами и други места погодни за размножување комарци.
Но, Македонија не е изолиран случај – повеќе од десет европски земји од почетокот на годината веќе пријавиле локално пренесени инфекции со вирусот Западен Нил. Според Европскиот центар за превенција и контрола на болести, најмногу случаи има во Италија – 311, а потоа следува Грција со 157 заразени. Вирусот досега е регистриран во 99 европски региони, од кои во 21 регион се појавува за првпат, додека во истиот период минатата година инфекции имало во 67 региони во девет земји. Меѓу погодените држави, покрај нашата се и Германија, Франција, Австрија, Шпанија, Италија, Грција, Холандија, Романија и Србија.
Најголемото ширење на вирусот се бележи во сезоната на комарци, особено од јули до септември, а ЕЦДЦ предупредува дека дополнителен проблем претставуваат и инвазивните видови комарци. Европските земји се повикани да ја засилат контролата на комарците, следењето на нивната популација и прекуграничната соработка за ограничување на ширењето на инфекцијата.
За вирусот Западен Нил нема одобрена вакцина за луѓе ниту специфичен третман, а иако најголем дел од заразените немаат симптоми или имаат лесна клиничка слика, во најтешките случаи инфекцијата може да предизвика менингитис и други животозагрозувачки компликации.
