Во Македонија досега се регистрирани вкупно 43 лица заболени од западнонилска треска, соопшти министерот за здравство Сашо Клековски и додаде дека за првпат случаи се регистрирани и во скопските општини Центар и Чаир.
Тој истакна дека има прва лоцирана мртва птица, гавран, со потврдена западнонилска треска во централното градско подрачје во Скопје. Пцовисаните птици се собираат од страна на Агенцијата за храна и ветеринарство.
Во скопскиот регион има 34 ризични подрачја од кои 13 се високоризични, а според министерот има два критериума за ризичност – застоеност на водата и високо ниво на органска материја. Високо ризични, според него, се каналите за наводнување во Скопско Поле, но и септичките јами, гробиштата, заради застоената вода во вазните и присуството на органски материјали во нив и третата група се отпади за стари гуми или генерално старите гуми кои се идеални престојувалишта за комарците.
