Спасувачките екипи во Индонезија започнаа интензивна потрага по 36 исчезнати работници, откако во пожар што избувна во фабрика за слатки на западниот дел од островот Јава загинаа најмалку три лица, а четворица се повредени.
Пожарот избувнал синоќа во фабрика во Чиканде, во округот Серанг. Причината за несреќата засега не е позната, а надлежните институции спроведуваат истрага за околностите под кои настанал пожарот.
Пожарникарите и денеска работат на гаснење на преостанатите жаришта, додека спасувачките тимови ги пребаруваат оштетените делови од објектот, каде што се стравува дека може да има уште затрупани работници.
Според досегашните информации, 15 лица успеале да се спасат од пожарот, а четворица од нив со повреди биле пренесени на лекување во болница.
Спасувачките операции продолжуваат, а властите не ја исклучуваат можноста бројот на жртви да се зголеми.
