Бендот Милко на 7 март во клубот Ѕе во ГТЦ ќе го одржи промотивниот концерт по повод излегувањето на своето ново EP издание „Последен ден“. Настапот ќе биде прва можност публиката во живо да го слушне новиот материјал, но и да се потсети на композициите што со години го дефинираат нивниот препознатлив звук.
Милко важат за едно од поконзистентните имиња на домашната алтернативна сцена. Со речиси две децении присуство, бендот останува релевантен благодарение на авторската доследност и внимателно градената музичка естетика.
Новото EP „Последен ден“ содржи четири песни создадени во изминатиот период и објавени за Шарла Рекордс. Изданието носи освежен звук и нов креативен импулс, а во неговото создавање учествуваат и Хана Корнети и Јоана Ристеска.
Концертната вечер ќе ја отвори Хана Корнети со соло настап, додека како специјален гостин ќе се приклучи и Нинослав Спировски на саксофон – музичар познат на скопската алтернативна џез сцена. Покрај новите песни, на репертоарот ќе се најдат и постари композиции што веќе имаат своја публика и меморија меѓу љубителите на инди звукот.
Со ова издание и концерт, Милко уште еднаш потврдуваат дека нивната приказна не е само носталгична, туку активна и развојна – дел од живата, современа домашна музичка сцена.
