Премиерот Христијан Мицкоски денеска во Њујорк одржа официјална средба со заменик-државниот секретар на Соединетите Американски Држави, Кристофер Ландау.
На средбата присуствувале и Брендан Харнахан, помошник-државен секретар за Европа, како и Даниел Лотон, заменик помошник-државен секретар за Европа, чиј ресор ги опфаќа и земјите од Балканот.
Средбата следува само еден ден по разговорите што Мицкоски ги имаше со американскиот државен секретар Марко Рубио, исто така во Њујорк.
Според премиерот, разговорите биле насочени кон натамошно зајакнување на стратешкото партнерство меѓу Македонија и САД, продлабочување на политичкиот и економскиот дијалог, како и кон прашања од заеднички интерес за двете земји.
„Средбата беше можност за отворен и суштински разговор за стратешкото партнерство со Соединетите Американски Држави, за продлабочување на политичкиот и економскиот дијалог, како и за прашањата од заеднички интерес за двете држави“, објави Мицкоски.
Тој нагласи дека во услови на глобални геополитички предизвици, од особена важност е Македонија да ги одржува и зајакнува односите со своите стратешки партнери, посочувајќи дека САД остануваат долгогодишен сојузник, а директната комуникација на високо политичко ниво е значајна за понатамошниот развој на билатералната соработка.
