Премиерот Христијан Мицкоски очекува Македонија и Србија да продолжат со добра соработка по формирањето на новата влада во соседната земја, со посебен акцент на економските односи.
Одговарајќи на новинарски прашања по промоцијата на мобилната апликација „м.Услуги“, Мицкоски рече дека веќе разговарал со носителот на Студентската листа, Илија Срдановиќ, кому му ја честитал изборната победа.
„Очекувам како добри соседи да работиме на подобрување на економијата, и во едната и во другата земја. Веќе се слушнав со носителот на листата, г. Срдановиќ, каде што ја честитав изборната победа“, изјави Мицкоски.
Тој беше прашан и за реакциите од опозицијата по изборниот пораз на Александар Вучиќ и Српската напредна партија. Премиерот оцени дека во периодот што следи очекува политички напади од страна на СДСМ.
„Јас им се извинувам на граѓаните што во периодот кој следи ќе бидат сведоци на една ваква кампања што изобилува со ад хоминем, со навреди и со многу ниски страсти што опозицијата ќе ги упатува кон мене. Од мене им е простено, а останатото останува на нив“, рече Мицкоски.
Од СДСМ претходно изјавија дека по поразот на Александар Вучиќ на изборите во Србија ќе бидат отворени истраги кои, според нив, треба да ги откријат наводните криминални соработки меѓу српските власти и премиерот Мицкоски.
