Страшен случај на семејно насилство ја вознемири јавноста во Охрид, откако млада девојка била брутално претепана, оставена без свест на улица и итно пренесена во болница. За нападот е уапсен 31-годишен охриѓанец.
Според досегашните информации, девојката и осомничениот Х.К. (31) претходно биле заедно во ресторан, каде што дошло до расправија. По напуштањето на објектот, двајцата се упатиле со автомобил, а нападот, според пријавеното, продолжил во возилото.
Според информациите, девојката била брутално претепана сè додека не ја изгубила свеста. Потоа, осомничениот наводно ја исфрлил од автомобилот и ја оставил на улица пред маркет, со тешки повреди.
Повредената била пронајдена кратко потоа и итно пренесена во болница, каде што била хоспитализирана поради сериозноста на повредите.
Од СВР Охрид информираат дека денеска, во 05:05 часот, полициски службеници го лишиле од слобода Х.К. (31) од Охрид, постапувајќи по претходна пријава дека физички ја нападнал својата девојка.
„Денеска (15.11.2026) во 05:05 часот во Охрид, полициски службеници од СВР Охрид го лишија од слобода Х.К.(31) од Охрид, постапувајќи по претходна пријава дека физички ја нападнал неговата девојка. По целосно документирање на настанот, против него ќе биде поднесена соодветна кривична пријава“, соопштија од СВР Охрид.
Мотивот за нападот и сите околности под кои се случил случајот ќе бидат предмет на понатамошната истрага.
