Од ЕУ пак ни стаса убавата вест дека Унијата многу сакала да се проширува со нови членки. На вчерашниот Самит ЕУ – Западен Балкан беше издадена декларација каде буквално стои: “Иднината ви е во Унија. Проширувањето претставува реална можност што треба да се искористи”.
Беше нагласено дури и дека „Итноста на нашето време бара одржлив моментум”.
Вакви пораки добиваме долго време. Ама ниту има проширување, ниту има некаква итност во Брисел кога е во прашање Македонија – се се сведува на крајот со ултиматумот – сменете го Уставот како што сака Бугарија, а потоа ќе видиме како понатаму.
Таа неизвесност долго си виси во воздухот. Затоа македонскиот прв дипломат Муцунски побара од земји членки на ЕУ поддршка во изнаоѓање решение со Софија, оти не гледа добра волја во Бугарија за разговор.
На Самитот премиерот Христијан Мицкоски потенцира дека Македонија заслужи вистинска евроинтеграција многу одамна оти нашиот пат започна пред 25 години, но поради вештачки причини сè уште не можеме да бидеме дел Унијата.
Ќе помогнат ли земји членки на ЕУ во процесот и ќе добие ли Македонија трасиран пат кон Унијата без билатералните прашања да бидат пречка, останува да се види. Уверувањата од Брисел дека многу сакаат да сме во Унијата не се доволни.
