Калифорнија стана најновата американска држава што целосно ги забрани детските бракови. Гувернерот Гевин Њусом потпиша закон со кој се утврдува дека брак ќе можат да склучуваат само лица кои наполниле 18 години, а новите правила ќе почнат да важат од 1 јануари.
Со ова, Калифорнија се приклучува на групата американски држави кои во последните години воведоа целосна забрана на оваа практика, додека во голем дел од САД малолетничките бракови сè уште се дозволени под одредени услови.
Потпишувањето на законот се одржа во присуство на Кортни Стоден, која стана позната откако на 16-годишна возраст стапи во брак со тогаш 50-годишниот актер Даг Хачисон. Денес таа е една од најгласните активистки против детските бракови и оцени дека новиот закон претставува голема победа за заштитата на децата.
Поддршка за измените дадоа и други жртви на детски бракови. Британи Би, која како малолетничка стапила во брак за да избега од семејно насилство, изјави дека Калифорнија испратила силна порака дека децата заслужуваат заштита и право сами да ја изберат својата иднина.
Слично сведоштво сподели и Сара Таснин, која раскажа дека била принудена да се омажи на 15 години за човек речиси двојно постар од неа. Таа истакна дека со години се борела за законски измени и дека е среќна што идните генерации нема да се соочуваат со истата судбина.
Досега Калифорнија немаше утврдена минимална возраст за склучување брак, па малолетници можеа да се венчаат со согласност од родителите и одобрение од суд. Активистите предупредуваат дека токму ваквата законска рамка оставила многу деца заробени во насилни и принудни бракови.
Според организацијата „Unchained At Last“, која се залага за искоренување на детските бракови во САД, во Калифорнија годишно биле склучувани околу 9.000 бракови во кои учествувале малолетници, при што во најголем дел станувало збор за девојчиња кои стапувале во брак со возрасни мажи.
Со новиот закон, државните власти порачаа дека заштитата на децата има предност пред сите досегашни исклучоци и дека од почетокот на 2027 година малолетничките бракови повеќе нема да бидат дозволени во Калифорнија.
