Кандидатот на Националната алијанса за интеграција, Аркин Јахиј, освои најмногу гласови во вториот круг од вонредните избори за градоначалник на Општина Брвеница.
Според првичните неофицијални резултати што ги објави Државната изборна комисија, Јахиј добил 4.442 гласа, додека кандидатот на коалицијата предводена од ВМРО-ДПМНЕ, Стојанчо Радичевски, освоил 4.177 гласа.
Разликата меѓу двајцата кандидати изнесува 265 гласа. Резултатите се добиени по електронски пат од сите 24 избирачки места во десетте населени места во Општина Брвеница.
Излезноста во вториот круг била 54,29 отсто, односно на гласање излегле 8.820 избирачи.
Претседателот на ДИК, Бојан Маричиќ, информираше дека изборниот процес поминал во фер и демократска атмосфера.
Кандидатите и подносителите на листи имаат право да поднесат приговори до ДИК за постапката на гласање во рок од 48 часа по завршувањето на гласањето. Приговорите можат да се достават најдоцна до вторник, 3 ноември, до 19 часот.
ДИК треба да одлучи по приговорите во рок од 72 часа од нивниот прием, а против одлуката може да се поднесе тужба до Управниот суд во рок од 24 часа. Судот потоа треба да донесе одлука во рок од 48 часа.
Конечните резултати од изборите ДИК ќе ги објави по завршувањето на целата постапка по евентуалните приговори.
– Ги очекуваме записниците од сите избирачки места и утре во текот на денот ќе закажеме седница за соопштување на првичните официјални резултати – изјави Маричиќ.
