ОЈО Охрид отвори истрага против три лица поради сомнение дека со несоодветно постапување со отпад ја загрозиле животната средина и природата.
Како што информираат од обвинителството, тројцата осомничени на 17 септември со товарно возило донеле отпад до депонијата „Буково“, каде што започнале да горат гумени отпадни кабли за да ги издвојат бакарните жици.
При согорувањето бил создаден густ чад, а во воздухот биле испуштени штетни материи, со што, според надлежните, било загрозено животното опкружување.
Основното јавно обвинителство Охрид донесе наредба за спроведување истражна постапка против тројцата за кривично дело „Загрозување на животната средина и природата со отпад“ според член 230 став 1 од Кривичниот законик.
Јавниот обвинител до судијата на претходна постапка при Основниот суд во Охрид доставил предлог за определување мерка притвор за осомничените, поради опасност од бегство и можност за влијание врз сведоци во текот на постапката.
