Иран е подготвен да одговори на секоја евентуална агресија, но истовремено останува отворен за дипломатско решение на кризата со Соединетите Американски Држави, изјави иранскиот министер за надворешни работи Абас Арагчи.
Во интервју за Ен-би-си, Арагчи порача дека Техеран нема да се повлече доколку дојде до ескалација на конфликтот, дури и ако, како што рече, тој прерасне во „војна до судниот ден“.
Тој откри и детали од иранскиот предлог за седумдневен план за деескалација и повторно отворање на Ормускиот Теснец. Според предлогот, Иран бара укинување на американската поморска блокада на неговите пристаништа, олеснување на санкциите за извоз на нафта и ослободување на околу 12 милијарди долари замрзнати ирански средства.
Американскиот претседател Доналд Трамп претходно соопшти дека го одбил овој предлог, нагласувајќи дека Вашингтон останува на ставот разговорите да опфатат и прашања поврзани со иранската нуклеарна програма.
И покрај несогласувањата, комуникацијата меѓу двете страни не е целосно прекината. Трамп најави дека очекува нова рунда разговори со Иран во текот на оваа недела, додека Катар продолжува да посредува во обидите за намалување на тензиите и приближување на позициите на двете земји.
