Иран ги предупреди бродовите дека ќе се соочат со последици доколку користат рути низ Ормускиот Теснец кои Техеран ги смета за нелегални. Иранскиот орган задолжен за контрола на теснецот соопшти дека прекршувањето може да предизвика финансиски загуби и штети за бродовите, нивните сопственици, капетаните и екипажите.
Компаниите би можеле да се соочат и со ограничувања за идно минување на нивните бродови низ овој стратешки поморски премин. Техеран побара од сопствениците на бродови да преземат мерки за да спречат користење на рутите што ги смета за недозволени.
Истовремено, Иран преку Катар им доставил на САД седумдневен план за враќање на бродскиот сообраќај низ Ормускиот Теснец. Иранскиот министер за надворешни работи Абас Арагчи изјави дека Вашингтон треба да исполни одредени услови пред целосното отворање на теснецот. Американскиот претседател Доналд Трамп го отфрлил иранскиот предлог.
