Градоначалникот на Скопје, Орце Ѓорѓиевски, најави почеток на, како што ја нарече, најголемата теренска акција досега низ сите скопски општини, со цел директна комуникација со граѓаните и побрзо решавање на локалните проблеми.
Според најавата, теренските посети ќе започнат утре во Општина Кисела Вода, а ќе ги опфатат сите скопски општини. На средбите граѓаните ќе имаат можност лично да поставуваат прашања, да предложат решенија и да добијат одговори од надлежните институции.
Во посетите ќе учествуваат и директорите на јавните претпријатија на Град Скопје, како и претставници од градските служби и сектори, со цел побрзо постапување по барањата и проблемите на жителите.
Првата средба е закажана за 27 мај во Домот на култура „Билјана Беличанец“ во Кисела Вода, со почеток во 19:30 часот.
Ѓорѓиевски оцени дека во изминатите шест месеци биле реализирани и започнати повеќе проекти кои со години биле оставени без реализација. Тој порача дека Скопје во моментов е активно градилиште во кое се инвестира и се работи на нови инфраструктурни и развојни проекти.
