Претседателот на Собранието, Африм Гаши, денеска оствари средба со министерот за труд на Државата Катар, Али бин Самик ал Мари, на која беа разгледани можностите за унапредување на соработката меѓу Северна Македонија и Катар.
Гаши истакна дека средбата се одржува во година кога се одбележуваат 30 години од воспоставувањето на дипломатските односи меѓу двете земји, оценувајќи дека овој јубилеј претставува можност за дополнително интензивирање на билатералните односи.
Посебен акцент, според него, треба да се стави на економската соработка, енергетиката, туризмот и образованието, како области со значителен потенцијал за заеднички развој.
Претседателот на Собранието се осврна и на значењето на парламентарната дипломатија, посочувајќи дека таа има важна улога во градењето односи меѓу државите и создавањето мостови меѓу народите, особено во период на глобални предизвици.
Катарскиот министер за труд, Али бин Самик ал Мари, изрази благодарност за гостопримството и нагласи дека неговата посета е потврда за добрите односи што ги градат двете држави.
Тој посочи дека потпишувањето на Меморандумот за соработка во областа на трудот ќе претставува значаен чекор и основа за развој на понатамошна соработка во повеќе сфери.
