Пожарите во Македонија се уште се секојдневие. До утринава биле регистрирани вкупно 29 пожари на отворен простор од кои три се активни а три се ставени под контрола.
Како што соопштија од Центарот за управување со кризи најголемите проблеми во моментов се предизвикани на Кожув, каде што гори букова шума, како и кај Македонски Брод каде е зафатена дабова шума и папрат.
Третиот активен пожар е кај селото Малино во општина Чучер Сандево, каде што пламените јазици брзо се шират низ мешана шума. Надлежните институции апелираат граѓаните да бидат максимално внимателни, бидејќи и најмал невнимателен потег може да предизвика нови пожари. А граѓаните пак преку социјалните мрежи повикуваа органите на прогон да бидат повнимателни оти дел од пожарите се намерно подметнати.
За потсетување, ова лето како што соопштија од МВР поднесени се 32 кривични пријави во врска со пожари на отворен простор, а лишени од слобода беа 56 лица.
