Основното јавно обвинителство Скопје поднесе обвинителен предлог против шест лица осомничени за фалсификување возачки дозволи, информираа од Јавното обвинителство.
Обвинетите се товарат за продолжено кривично дело „Фалсификување исправа“ според член 378 од Кривичниот законик.
Според обвинението, првообвинетата, која била вработена во Министерството за внатрешни работи како помлад советник за патни исправи во Одделението за управни работи во Скопје, во периодот од септември 2020 до август 2026 година, со злоупотреба на службените пристапни шифри извршувала измени во возачки дозволи.
Обвинителството наведува дека таа во повеќе случаи внесувала дополнителни категории во документите, иако лицата не ги исполнувале законските услови за нивно стекнување.
Останатите пет обвинети, според наводите, биле лица кои немале положено возачки испит за категориите Ц и Д, но преку договор со службеничката поднесувале барања во кои биле внесувани овие категории.
Со така изменетите возачки дозволи, дел од обвинетите успеале да добијат сертификати за професионална компетентност за возачи во меѓународен превоз на патници и стоки, по што управувале автобуси и товарни возила во меѓународниот сообраќај.
Обвинителството побара продолжување на притворот за тројца обвинети, меѓу кои и вработената во МВР. За останатите тројца кои се недостапни за органите на прогонот е предложено определување притвор по нивното пронаоѓање, како и водење на постапката во нивно отсуство.
Во рамки на истиот предмет, истрагата продолжува и за уште 21 лице за кое постојат сомневања дека било посредник или корисник на фалсификувани возачки дозволи. Обвинителството проверува и други можни злоупотреби поврзани со целиот случај.
