До 18:30 часот денеска, Центарот за управување со кризи (ЦУК) евидентирал вкупно 16 пожари на отворен простор низ државата. Од нив, четири се активни, два се ставени под контрола, а 10 се целосно изгаснати.
Според информациите од ЦУК, активни се пожарите кај селото Горно Свиларе во општина Сарај, каде гори мешана шума и ниска вегетација, во општина Шуто Оризари, каде е зафатено ѓубре, на воениот полигон Криволак во општина Неготино, каде гори сува вегетација, како и кај селото Ларце во општина Желино, каде пожарот зафатил ниска вегетација.
Под контрола се пожарот кај селото Белица, на месноста Кајорец, кој се проширил кон Јасен и зафатил нискостеблеста и мешана шума, како и пожарот на депонијата кај селото Пчиња во општина Куманово.
Во текот на денот, противпожарните екипи успешно изгаснале 10 пожари на територијата на општините Бутел, Сарај, Битола, Кривогаштани, Струмица, Радовиш и Брвеница.
Од ЦУК посочуваат дека пожарите зафатиле различни видови вегетација, стрништа, депонии и отпад, а надлежните служби и понатаму остануваат на терен со цел целосно локализирање на активните жаришта.
