Обично во Македонија се појавуваа вести дека полицијата „чешлала” некои – институции, фирми, терен… и барала криминалци. Но вчера, стигна обратна вест: МВР било „чешлано”! Причината е злоупотреба на боледувања, при што, според Фондот за здравствено осигурување, околу 20 отсто од проверените случаи биле неправилни.
Оваа информација изненади дел од јавноста, оти нели полицајците се тие што се дебело платени да ловат криминалци, а не самите да прават криминал. Но, дел од јавноста и не е баш изненадена оти не се ретки случаите кога се уловени полицајци кои возеле без да имаа дозволи, за земање мито, за физички па дури и сексуални напади, за изнуда на пари…
Впрочем, секој има видено барем еднаш непрописно паркиран приватно возило, а внатре оставена полициска капа или елек – за да не биде казнет големиот заштитник на законот.
Да, да има во полицијата лица кои ја грубат сликата за МВР во која има многу чесни службеници кои си ја вршат работата како што треба.
Затоа, ова чешлање околу боледувањето треба да продолжи за многу други аномалии меѓи дел од полицајците. И тоа треба да се прави со специјалниот ситен чешел за вошки. Упатството вели, прво фино перење со специјален шампон, па се зема обичниот чешел и на крајот полека и внимателно да се употреби чешелот за вошки и гниди.
Го можат тоа во МВР, време е да го направат.
Полицијата мора да остане институција на доверба и место од каде граѓаните ќе бараат спас од криминалците, а не да гледаат како баш таму некои се за апсење.
