Владата очекува до крајот на декември да ги заврши сите реформи предвидени со Реформската агенда, а дел од клучните закони веќе се во завршна фаза на техничко усогласување со Европската комисија, соопшти премиерот Христијан Мицкоски.
По состанокот во Владата посветен на спроведувањето на реформите, Мицкоски изјави дека процесот се одвива според планираната динамика и дека сите активности се реализираат во рамките на предвидениот грејс-период.
Според него, четирите клучни закони од областа на јавната администрација – за административните службеници, вработените во јавниот сектор и високите раководни служби – се во фаза на техничко усогласување со Европската комисија.
„Очекувам дека на техничко ниво до крајот на месецот ќе се расчистат сите работи и ќе можеме да влеземе во парламент почетокот на декември, за до крај на декември да поминат овие закони“, изјави Мицкоски.
Тој посочи дека за овие законски решенија останале уште една или две забелешки од Европската комисија, кои треба да бидат усогласени во наредниот период.
Осврнувајќи се на новиот Закон за оружје, премиерот рече дека предлозите на експертите од СИГМА, според домашните експерти и професори по уставно право, содржат решенија кои не се во согласност со Уставот, но изрази очекување дека и ова прашање ќе биде надминато преку дијалог.
Мицкоски информираше дека Кривичниот законик и Законот за кривична постапка веќе се испратени во Брисел на разгледување, а потребните усогласувачки табели треба да бидат доставени најдоцна до понеделник.
Едно од прашањата што сè уште се разгледува е финансирањето на судството и јавното обвинителство. Премиерот рече дека е постигнат компромис со Судскиот совет и Советот на јавни обвинители, кој веќе е доставен до Европската комисија.
„Дојдовме до еден компромис, тој го претставивме вчера на состанокот и очекуваме Европската комисија да даде свое мислење“, изјави Мицкоски.
Според предложеното решение, судскиот буџет постепено треба да достигне 0,8 проценти од бруто-домашниот производ, додека буџетот на Јавното обвинителство би изнесувал 0,5 проценти од вкупниот државен буџет.
Во тек е и усогласувањето на Законот за Академијата за судии и јавни обвинители, каде што остануваат да се договорат моделот на финансирање и институционалната поставеност. Владата во понеделник ќе испрати дополнително образложение до Европската комисија.
Покрај реформите во правосудството, според премиерот, се бележи напредок и во областа на дигиталната трансформација, додека Министерството за транспорт очекува мислења за пет законски решенија поврзани со интелигентниот транспорт во железничкиот и патниот сообраќај.
Во енергетскиот сектор, како што посочи Мицкоски, остануваат уште два чекора кои треба да бидат реализирани во текот на ноември.
„Очекуваме сите овие реформи кои се во грејс-период до декември 2026 година да бидат завршени. Во детали ги имаме разработено“, порача премиерот, додавајќи дека Владата останува целосно посветена на исполнувањето на реформската агенда.
