Министерството за животна средина ќе воспостави пет нови дигитални платформи преку кои граѓаните ќе имаат директен пристап до податоци за состојбите во животната средина, загадувањето, дивите депонии и проектите што ги реализира институцијата.
Министерот за животна средина Муамет Хоџа истакна дека дигитализацијата ќе придонесе за поголема транспарентност, поефикасна администрација и подобра борба против еколошкиот криминал.
„Дигитализацијата е алатка за транспарентност и правда, каде што завршува неефикасноста на системот и влијанијата на човечкиот фактор. Податоците ќе се користат за борба со еколошкиот криминал и ќе бидат достапни за сите граѓани“, изјави Хоџа.
Првата платформа, „Темели“, ќе овозможи јавен увид во сите проекти што ги реализира Министерството, вклучувајќи ги нивната вредност, роковите за реализација, локациите и изворите на финансирање.
Платформата „Јадро“ предвидува целосна дигитализација на архивата и просторно-информативниот систем. Со новото решение, граѓаните ќе можат електронски да го следат статусот на своите предмети и да добијат информации кој службеник постапува по нив. Воедно, веќе е завршена дигитализацијата на геопросторните податоци за заштитените подрачја.
Преку модулот „Време“ ќе се поедностават административните постапки во Министерството. Од вкупно околу 30 предвидени чекори за поедноставување, 15 треба да бидат реализирани до крајот на годината.
Платформата „Земја“ ќе овозможи дигитално мапирање на дивите депонии низ општините, со цел подобро планирање на нивното расчистување и подготовка за регионалните центри за управување со отпад. Истовремено, во дел од општините веќе се реализира пилот-проект за видео-надзор на дивите депонии.
Петтата платформа, „Воздух“, ќе воспостави дигитален регистар преку кој 140 компании со А-интегрирани еколошки дозволи ќе ги објавуваат податоците за емисиите на загадувачки материи. Регистарот е поврзан со Законот за контрола на емисиите во воздухот, кој ќе почне да се применува од септември 2027 година.
Министерот најави дека секоја од платформите ќе биде посебно претставена пред јавноста во наредниот период, при што детално ќе бидат објаснети нивните функции и придобивки. Според него, проектот претставува значаен чекор кон модернизација на институциите и поефикасна заштита на животната средина.
