ВМРО-ДПМНЕ реагираше на последните изјави на лидерот на СДСМ, Венко Филипче, обвинувајќи го дека одговорноста за состојбите во партијата ја префрла на други лица, наместо да се соочи со реалните проблеми.
Од владејачката партија велат дека Филипче „постојано бара виновници“ за падот на СДСМ, откако поранешни функционери и членови на партијата јавно изразиле несогласување со неговото раководење.
„Филипче излезе во јавноста и почна да го вперува прстот кон поранешни функционери и симпатизери на СДС кои не се согласуваат со него, наместо да се соочи со фактот дека проблемите во неговата партија се резултат на неговото водство“, наведуваат од ВМРО-ДПМНЕ.
Од партијата додаваат дека во последниот период се појавуваат иницијативи и опозициски фронтови од поранешни членови на СДСМ кои бараат промени во раководството, оценувајќи дека Филипче нема успеано да ја постави партијата како силна опозиција.
„Никој не му е крив на Филипче што СДС се распаѓа. Напротив, на ВМРО-ДПМНЕ му одговара вакво СДС на чело со него“, стои во соопштението.
Од ВМРО-ДПМНЕ посочуваат дека, според нив, СДСМ во изминатиот период не успеал да понуди јасна политичка понуда, туку се занимавал со ширење страв и креирање теми без резултат.
„По две години ширење паника и хаос во јавноста, СДС со Венко не успеа да направи ништо, не успеа ниту да биде опозиција во вистинска смисла на зборот“, додаваат од партијата.
ВМРО-ДПМНЕ оценува дека резултатите од изборните циклуси и јавното мислење, како што велат, покажуваат дека СДСМ се соочува со сериозна криза на доверба.
„Ако продолжат вака, ќе исчезнат само како политичка партија“, се наведува во соопштението на ВМРО-ДПМНЕ.
