19-годишен маж е убиен синоќа во Дрниш, а хрватската полиција интензивно трага по 50-годишен осомничен кој избегал по пукањето.
Според информациите од Полициска управа Шибеник-Книн, злосторството се случило околу 23:05 часот на тераса од семејна куќа во градот.
Досегашните информации укажуваат дека 50-годишниот К.А. употребил огнено оружје и пукал во 19-годишниот хрватски државјанин, кој починал на самото место од здобиените повреди.
Според хрватските медиуми, младиот човек наводно доставувал нарачана храна до осомничениот, по што дошло до трагичниот инцидент под засега неразјаснети околности.
Во текот на ноќта, полицијата соопшти дека на терен биле распоредени голем број полициски сили и дека се спроведува обемна потрага по сторителот, како и истрага за утврдување на сите детали околу случајот.
Од полицијата потврдија и дека осомничениот претходно им бил познат на органите на редот. Во 2023 година против него била поднесена кривична пријава за нелегално поседување, производство и набавка на оружје и експлозивни материи.
Потрагата по осомничениот продолжува, а истражните служби работат на целосно расветлување на убиството.
