На 7 март, во просторот на Даре Џамбаз во Скопје, од 14 до 21 часот ќе се одржи ФИЈУК Саем – настан посветен на независната уметничка сцена и современите креативни практики.
Саемот ќе понуди целодневна програма со изложби, книжевна промоција, работилница и музички настапи во живо. Пролетното издание ќе започне со промоција на книга со колажи од Милета Мијатовиќ, објавена од шведскиот штампарски колектив Longest Night од Гетеборг. Во соработка со Скопје Колаж Колектив ќе се одржи и работилница за колажи.
Во изложбениот дел ќе учествуваат бројни автори и колективи од различни области – фотографија, графика, дизајн, музика, поезија, колаж и сликарство. Меѓу нив се Longest Night, Арт Еквилибриум / Бош Фестивал, Црна Хроника, Ертунч Сали и Кула, Тома Димовски, Ефиним Магазин, Јован Гаковски, Марио Каев, Beamoff.art, Филипа Сара Попова, Јана Николовска, Јелена Белиќ, Марко Трепески, Ева Симеска, Искра, Shock Troopers, Шарла рекордс, Партизанска штампа, Private Print и други.
Настанот претставува платформа за директна средба меѓу авторите и публиката, како и простор за размена на идеи, соработка и промоција на независната продукција.
По завршувањето на саемскиот дел, програмата продолжува со ФИЈУК афтер-концерт на Милко, со почеток во 21 часот во Паб Ѕе.
