Тешко е повредена 33-годишна жена од Ресен во сообраќајна несреќа што се случила на магистралниот пат Битола–Ресен, во близина на местото познато како „Чешмите“, информира Министерството за внатрешни работи.
Според полициските информации, несреќата се случила на 22 октомври 2026 година во 07:17 часот, а во СВР Битола било пријавено дека дошло до судир меѓу патничко возило „Фиат“ со ресенски регистарски ознаки, управувано од 33-годишната С.Р. од Ресен, и товарно возило „Мерцедес“ со скопски регистарски ознаки, кое го управувал 64-годишниот З.Р. од Велес.
Во судирот возачката на „Фиатот“ се здобила со тешки телесни повреди, кои биле констатирани во болницата во Битола.
На местото на несреќата увид извршила увидна екипа на СВР Битола, а причините и околностите под кои дошло до сообраќајката ќе бидат утврдени во понатамошната истрага.
