На денешното рочиште за пожарот во дискотеката „Пулс“ не се појави ниту еден претставник на градежната компанија „Венци проект“, која ги изведувала градежните зафати во објектот, со образложение дека имале работни обврски.
Компанијата требаше да даде одговри за градежните интервенции кои биле извршени во објектот и дали за нив биле потребни соодветни дозволи и лиценци.
Во судницата во Идризово продолжи испитувањето на градежниот вештак Петре Русевски, предложен од одбраната кој тврдеше дека во дискотеката „Пулс“ биле изведувани исклучиво градежно-занаетчиски работи, а не реконструкција на објектот, поради што, според неговото толкување, не биле потребни лиценци.
Обвинителството, пак, на претходното рочиште, при вкрстеното испрашување, ги оспори неговите тврдења, посочувајќи дека дел од исказите не се совпаѓаат со наодите во градежното вештачење што самиот го изготвил.
