Украинскиот претседател Володимир Зеленски изјави дека е задоволен од пораките што ги добива од Соединетите Американски Држави во рамки на дипломатските напори за ставање крај на војната со Русија.
Говорејќи по средбата со лидерите на нордиските земји во Данска, Зеленски се осврна и на првиот ден од трилатералните разговори меѓу Украина, Русија и САД, кои се одржуваат во Абу Даби.
„Гледам промени. Многу сум задоволен од она што го слушам“, изјави Зеленски, коментирајќи ги пораките од американските претставници Џаред Кушнер и Стив Виткоф.
Украинскиот претседател оцени дека првиот ден од разговорите бил конструктивен и суштински, додавајќи дека на средбите се разговарало и за можноста за воспоставување нова безбедносна архитектура во Европа.
Сепак, тој истакна дека околу ова прашање постојат бројни непознати.
„Сите сме многу претпазливи во врска со оваа тема бидејќи никој навистина не знае што точно се предлага. Никој не ги видел документите, ниту деталите од разговорите меѓу Американците и Русите“, рече Зеленски.
Тој потсети дека идејата за нова европска безбедносна архитектура била промовирана од рускиот претседател Владимир Путин уште во 2021 година, а тогашната американска администрација сметала дека најпрво треба да се стави крај на конфликтот.
Според Зеленски, редоследот на чекорите е клучен.
„Прво, запирање на војната во Украина. Второ, безбедносни гаранции за Украина. Дури потоа може да се разговара за безбедноста во Европа и светот“, изјави тој.
Во меѓувреме, рускиот министер за надворешни работи Сергеј Лавров порача дека Москва нема да прифати моментален прекин на огнот без претходно да биде договорено што ќе следува понатаму. Според него, најнапред треба да се разговара за идната безбедносна архитектура во Европа, а потоа за прекин на воените дејствија.
