Вчера 37 советници гласа ЗА ребаланс на буџетот на Град Скопје. Градоначалникот Орце Ѓорѓиевски предлогот го образложи дека се обезбедуваат средства за стабилизација на градските финансии, унапредување на инфраструктурата, подобрување на јавниот превоз, инвестирање во образованието и развој на нови зелени површини…
За кои проекти конкретно ќе се потрошат парите од ребалансот?
– Во делот на јавниот превоз се предвидува враќање на приватните превозници во системот и продолжување на соработката со Министерството за транспорт за повторно активирање на Градскиот воз.
– До крајот на годината, сите училишта ќе добијат нови спортски терени, фитнес-зони, смарт табли, информатички кабинети и лаптоп за секој првенец на генерација, а ќе биде решен и хроничниот недостаток на училишни клупи и столчиња.
– Започнува реализацијата на повеќе зелени проекти, меѓу кои паркот „Христијан Тодоровски – Карпош“, паркот „Лепенец“ и дополнителни 50 мали паркови низ различни делови од градот.
– Ќе се продолжи со реконструкцијата на улицата „Фрањо Клуз“, изградбата на кружниот тек во Ѓорче Петров, третата лента на булевар „Александар Македонски“, првата фаза на булевар „Хрватска“, булевар „АСНОМ“ и клучката кај „Момин Поток“.
– Предвидени се средства за експропријација, со што се отвора можност за реализација на големите булеварски решенија, вклучително и продолжувањето на булевар „Борис Трајковски“.
Градоначалникот Ѓорѓиевски порача дека со усвојувањето на ребалансот завршува периодот на застој и започнува нова фаза на стабилизација и развој на Град Скопје, со јасна намера градот да се врати на вистинскиот развоен пат.
