Во седиштето на НАТО во Брисел денеска ќе се одржи вонреден состанок на Воениот комитет на Алијансата на ниво на постојани амбасадори на земјите членки, на кој ќе се разговара за нарушување на воздушниот простор на Пактот од страна на руски летала.
Состанокот е свикан на барање на Естонија по инцидентот во петокот кога три руски воени авиони МиГ-31К без дозвола упаднаа во естонскиот воздушен простор. Според естонското Министерство за одбрана, трите руски борбени авиони во воздушниот простор на Естонија се задржале речиси 12 минути.
Талин побара итен состанок врз основа на Член 4 од Договорот на НАТО, со цел Алијансата да реагира на инцидентот, поради кој Естонија најави затворање на својата источна граница кон Русија.
Членот 4 предвидува дека „членките заедно ќе се консултираат секогаш кога, според мислењето на која било од нив, се загрозени територијалниот интегритет, политичката независност или безбедноста на која било од членките“.
НАТО уште во петокот соопшти дека Алијансата веднаш реагирала на навлегувањето на авионите во естонскиот воздушен простор и ги пресретнала руските МиГ-31К.
-Ова е уште еден пример за неодговорно руско однесување и способноста на НАТО да одговори, изјави портпаролката на Алијансата, Алисон Харт.
Инцидентот го осуди и високата претставничка на ЕУ за надворешни работи и безбедносна политика, Каја Калас, која оцени дека нарушувањето на естонскиот воздушен простор од страна на руски воени авиони претставува „исклучително опасна провокација“.
Москва, од своја страна, тврди дека летот на нејзините МиГ-ови бил во согласност со меѓународните правила за користење на воздушниот простор и дека „не ги прекршиле границите на други држави“.
За ова прашање, Естонија веќе иницираше итен состанок и на Советот за безбедност на ОН.
